* गृह उत्सव : प्रॉपर्टी प्रदर्शनात ३० हजार २१७ जणांची भेट, २१७ जणांची घरखरेदी, १२५० कोटींचे गृहकर्ज वाटप
* www.credaimchi.com या वेबसाईटवर प्रदर्शन वर्षभर सुरू राहणार
* ठाणे शहरात `स्वप्नातील घर’ घेण्याची नागरिकांची इच्छा पूर्ण होणार
ठाणे : मुंबई महानगर क्षेत्रासह ठाण्यातील रिअल इस्टेट विश्वात ग्राहकांच्या सर्वाधिक पसंतीच्या `क्रेडाई एमसीएचआय, ठाणे’ यांच्या प्रॉपर्टी प्रदर्शन २०२४ ने यंदा वैभवशाली कामगिरी नोंदविली आहे. या प्रदर्शनाला यंदा तब्बल ३० हजार २१७ जणांनी भेट दिली. तर २१७ कुटुंबांचे ठाणे शहरात घराचे स्वप्न साकार झाले. तर विविध बॅंका व वित्त संस्थांकडून सुमारे एक हजार २५० कोटींहून अधिक कर्जाचे वाटप करण्यात आले.
`क्रेडाई एमसीएचआय, ठाणे’ यांच्यावतीने पोखरण रोड क्र. १ वरील रेमंड मैदानावर १६ फेब्रुवारीपासून चार दिवसांचे `गृह उत्सव : प्रॉपर्टी प्रदर्शन २०२४’ भरविण्यात आले होते. या प्रदर्शनाला नागरिकांचा अभूतपूर्व प्रतिसाद मिळाला. मुंबई महानगर क्षेत्रात आघाडीवर असलेल्या बांधकाम व्यावसायिकांकडून प्रदर्शनात सहभाग घेण्यात आला. त्यात ५० हून अधिक बांधकाम व्यावसायिकांनी १०० हून अधिक गृह प्रकल्प व व्यावसायिक प्रकल्प सादर केले होते. तर कर्जपुरवठा करण्यासाठी १५ हून अधिक बॅंका व वित्त संस्थांनी सहभाग नोंदविला.
ठाण्यात शुक्रवारपासून सुरू झालेल्या चार दिवसांच्या प्रदर्शनाला अभूतपूर्व प्रतिसाद मिळून, प्रॉपर्टी प्रदर्शनाने यंदा वैभवशाली कामगिरी नोंदविली. ठाणे शहरात वास्तव्यासाठी शेकडो नागरिकांनी पसंती दिली, याबद्दल `क्रेडाई एमसीएचआय, ठाणे’चे अध्यक्ष जितेंद्र मेहता यांनी आनंद व्यक्त केला. या प्रदर्शनाला चार दिवसांमध्ये ३० हजार २१७ जणांनी भेट दिली.त्यात २१७ जणांनी घर वा व्यावसायिक मालमत्ता खरेदी केली. तर एक हजार २५० कोटींहून अधिक गृहकर्जाचे वाटप करण्यात आले. या प्रदर्शनाच्या यशस्विततेसाठी क्रेडाई-एमसीएचआय, ठाणेचे पदाधिकारी, आयोजक समिती आणि सदस्यांनी नियोजन केले होते, अशा शब्दांत अध्यक्ष जितेंद्र मेहता यांनी सर्वांचे कौतुक केले.
ठाणे शहर हे सांस्कृतिक, सामाजिक आणि सुरक्षिततेच्या दृष्टीकोनातून उत्तम शहर आहे. मुंबई महानगर क्षेत्रात ठाणे शहराने नावलौकिक संपादन केला आहे. शहरातील रिअल इस्टेट क्षेत्रानेही अपेक्षित विकास केला असून,ग्राहकांच्या अपेक्षा व गरजेनुसार घरांबरोबरच उत्तम जीवनशैली असलेली घरे उपलब्ध केली आहेत. घर खरेदी करणाऱ्या ग्राहकांसाठी ठाणे शहर हा उत्तम पर्याय ठरला, अशी प्रतिक्रिया `क्रेडाई एमसीएचआय, ठाणे’चे अध्यक्ष श्री. जितेंद्र मेहता यांनी व्यक्त केली.
`क्रेडाई एमसीएचआय, ठाणे’ यांच्या वतीने २० वर्षांपासून आयोजित केलेल्या गृह उत्सव : प्रॉपर्टी प्रदर्शनाने रिअल इस्टेट क्षेत्रात वैशिष्ट्यपूर्ण स्थान मिळविले आहे. ग्राहकांच्या विश्वासाने प्रदर्शनाला प्रतिष्ठा मिळाली, असे `क्रेडाई एमसीएचआय, ठाणे’चे माजी अध्यक्ष श्री. अजय आशर यांनी सांगितले. ठाण्यात घरखरेदीसाठी इच्छूक असलेल्या नागरिकांना प्रदर्शनाच्या माध्यमातून योग्य व्यासपीठ उपलब्ध झाले, असे श्री. आशर यांनी नमूद केले.
ठाणे शहरात रिअल इस्टेट क्षेत्राचा विकास वेगाने होत असून, ते गुंतवणूकदारांच्या दृष्टीने महत्वाचे शहर झाले आहे. ठाण्यातील गुंतवणुकीला उत्तम परतावा मिळत असून, नवनवीन उत्तमोत्तम प्रकल्प शहरात साकारले जात आहेत. गेल्या २० वर्षांत `क्रेडाई एमसीएचआय, ठाणे’ यांच्या प्रॉपर्टी प्रदर्शनाने नागरिकांना घरखरेदीसाठी उत्तम पर्याय उपलब्ध झाला, असे प्रदर्शन समितीचे अध्यक्ष संदीप माहेश्वरी यांनी सांगितले.
या प्रदर्शनाला भेट देता न आलेल्या इच्छूक ग्राहकांसाठी, `क्रेडाई एमसीएचआय, ठाणे’ यांनी २१ वे प्रॉपर्टी प्रदर्शन ऑनलाईनवर पुढील वर्षभर भरविण्याचे ठरविले आहे. इच्छूक ग्राहकांना www.credaimchi.com या वेबसाईटवर प्रदर्शन पाहता येईल. `क्रेडाई एमसीएचआय, ठाणे’ यांच्या वतीने एक आदर्श, विश्वासार्ह आणि अधिकृत घरे देणारी संस्था म्हणून नावलौकिक निर्माण केला आहे. ग्राहकांना स्वप्नातील घरे उपलब्ध करण्याबरोबरच क्रेडाई एमसीएचआय, ठाणे संस्थेने सामाजिक बांधिलकीही जपली आहे, असे अध्यक्ष जितेंद्र मेहता यांनी सांगितले. तसेच २१ व्या प्रदर्शनाला भेट दिल्याबद्दल नागरिकांचे मेहता यांनी आभार मानले.
