नवी दिल्ली : सर्वोच्च न्यायालयाचे न्यायमूर्ती भूषण गवई यांचा देशाच्या सरन्यायाधीशपदाचा कार्यकाळ १३ मेपासून सुरू होणार आहे. त्यांना १४ मे रोजी राष्ट्रपती भवनात आयोजित समारंभात सर्वोच्च न्यायालयाचे मुख्य न्यायाधीश म्हणून पद आणि गोपनीयतेची शपथ देण्यात येणार आहे. न्यायमूर्ती भूषण गवई देशाचे सरन्यायाधीश होत असल्याने अमरावती जिल्ह्यात आतापासूनच आनंदी आनंद दिसून येत आहे. शपथविधीनंतर लगेचच अमरावतीत भव्य नागरी स्वागत होणार आहे. अमरावती शहरासह जिल्ह्यासाठी हा अत्यंत अभिमानाचा आणि सन्मानाचा क्षण असेल. त्यामुळे अमरावतीकरांमध्ये आनंदाचे वातावरण पाहायला मिळत आहे.
अमरावतीचे सुपूत्र न्या. भूषण गवई यांचे हे यश आणि यश साजरे करण्याची तयारी आतापासूनच सुरू झाली आहे. उल्लेखनीय आहे की, आरआयपी नेते, माजी खासदार तथा माजी राज्यपाल रा. सु. उर्फ दादासाहेब गवई व माजी लेडी गव्हर्नर डॉ. कमलताई गवई यांचे ते जेष्ठ पुत्र आहेत. न्या.भूषण गवई यांचे प्राथमिक शिक्षण अमरावती येथे झाले. मुंबईतून कायद्याची पदवी घेतल्यानंतर काही काळ मुंबईत वकीली व्यवसाय केल्यानंतर न्या. भूषण गवई यांनी अमरावती जिल्हा व सत्र न्यायालयातही विधीज्ज्ञ म्हणून सेवा दिली. अमरावती येथील न्या. भूषण गवई यांचे अनेक जवळचे मित्र आणि कुटुंब आहेत. तसेच १९९० च्या सुमारास नागपुरात जाऊन सेवानिवृत्त न्यायाधीश अॅड. राजा एस. भोसले यांच्यासोबत त्यांनी सराव सुरू केला. न्या. भूषण गवई होणार सरन्यायाधीश… नागपूरला आपले कार्यक्षेत्र बनवले. न्या. भूषण गवई यांनी अमरावतीतील त्यांच्या मित्रांशी सतत संपर्क ठेवला आणि अनेकवेळा ते अमरावतीला येत राहिले.
उच्च न्यायालयात आणि नंतर सर्वोच्च न्यायालयात न्यायमूर्ती झाल्यानंतरही हा क्रम त्यांनी कायम ठेवला आहे. यामुळे न्या. भूषण गवई यांना सर्वोच्च न्यायालयाचे मुख्य न्यायमूर्तीपद मिळणार असल्याचा आनंद अमरावतीत राहणाऱ्या सर्व मित्रमंडळींमध्ये पाहायला मिळत आहे. अमरावती जिल्हा व सत्र न्यायालयात न्या. भूषण गवई यांचे समकालीन ज्येष्ठ कायदेतज्ज्ञ आपल्या आठवणींना उजाळा देताना अॅड. अशोक जैन म्हणाले की, १९८५ मध्ये मुंबईतून कायद्याची पदवी मिळवल्यानंतर न्या. भूषण गवई यांनी काही काळ मुंबईत प्रॅक्टिस केली होती आणि १९८९-९० या काळात ते पुन्हा अमरावतीला आले आणि येथे ज्येष्ठ कायदेतज्ज्ञ अॅड. प्रकाश उर्फ पी.एन. राठी यांच्या मार्गदर्शनाखाली सराव सुरू केला. त्यावेळी अॅड. राठी यांनी भूषण गवई यांची क्षमता पाहून त्यांना अमरावतीत वेळ घालवण्याऐवजी नागपूर उच्च न्यायालयात जाऊन सराव करण्याचा सल्ला दिला. न्यायमूर्ती भूषण गवई यांनी निवृत्त न्यायाधीश अॅड. राजाभाऊ भोसले यांच्यासोबत उच्च न्यायालयात प्रॅक्टिस सुरू केली आणि त्यांच्या मेहनतीच्या आणि क्षमतेच्या जोरावर पुढील दोन वर्षांत त्यांनी खासगी प्रॅक्टिस सोडून उच्च न्यायालयात सरकारी वकील म्हणून काम सुरू केले. सुमारे १०-११ वर्षे सहाय्यक, अतिरिक्त आणि मुख्य सरकारी अभियोक्ता म्हणून काम केल्यानंतर न्या. भूषण गवई यांची मुंबई उच्च न्यायालयाचे न्यायमूर्ती म्हणून नियुक्ती करण्यात आली आणि त्यांनी २०१९ पर्यंत मुंबई उच्च न्यायालयाच्या नागपूर खंडपीठात न्यायमूर्ती म्हणून काम केले. त्यानंतर २४ मे २०१९ रोजी न्या. भूषण गवई यांची देशाच्या सर्वोच्च न्यायालयाच्या न्यायमूर्तीपदी निवड झाली. ही अमरावती शहर व जिल्ह्यातील विधी क्षेत्रासह तमाम जनतेसाठी निश्चितच अभिमानाची बाब आहे. ऍड. अशोक जैन यांनी दिलेल्या माहितीनुसार, १४ मे रोजी नवी दिल्लीतील राष्ट्रपती भवनात सरन्यायाधीश म्हणून भूषण गवई यांचा शपथविधी सोहळा होणार आहे. ६ महिने १० दिवसांचा असेल कार्यकाल !
सूत्रांनी दिलेल्या माहितीनुसार, १३ मे २०२५ रोजी देशाचे ५४ वे सरन्यायाधीश म्हणून शपथ घेतल्यानंतर न्या. भूषण गवई २३ नोव्हेंबर २०२५ पर्यंत या पदावर राहतील, म्हणजेच सिजेआय म्हणून त्यांचा कार्यकाळ ६ महिने १० दिवसांचा राहणार आहे. अमरावतीला दुसऱ्यांदा सर्वोच्च पदाचा मान याआधी काँग्रेसच्या नेत्या, माजी खासदार व माजी राज्यपाल प्रतिभाताई पाटील यांनी राष्ट्रपती पद भूषवले आहे. याशिवाय माजी महामहिम प्रतिभाताई पाटील यांनी देशाच्या पहिल्या महिला राष्ट्रपती होण्याचा विक्रमही केला होता. परिणामी अमरावतीचे नाव संपूर्ण देशात परिचित झाले. आता अमरावतीचे सूपूत्र न्या. भूषण गवई हे सरन्यायाधीशपदाची जबाबदारी सांभाळणार आहेत. अमरावती जिल्ह्याला देशाचे सर्वोच्च पद मिळणार आहे. अमरावतीतून शेकडो वकील शपथविधीला जाणार न्या. भूषण गवई यांच्या थेट संपर्कात असलेले अमरावती बार असोसिएशनचे सुमारे १०० वकील दिल्ली येथील शपथविधीत सहभागी होणार आहेत. त्यासाठी पूर्वतयारी व नियोजन करण्यात आलेले आहे. न्या. भूषण गवई यांची मुख्य न्यायमूर्तीपदी नियुक्ती झाल्यानंतर अमरावती जिल्हा बार असोसिएशनच्या वतीनेही त्यांना अमरावती येथे निमंत्रित करून त्यांचे भव्य स्वागत करण्यात येणार आहे. यासाठीही बार असोसिएशनमध्ये आवश्यक चर्चा सुरू झाली आहे. मात्र, सध्या सर्व तयारी प्राथमिक स्वरुपात असून, ती मार्चअखेर पूर्ण होणार आहे.
