मुंबई : स्टँडअप कॉमेडियन कुणाल कामराने उपमुख्यमंत्री एकनाथ शिंदे यांच्यावर विडंबनात्मक गाणं गायल्याने कुणाल कामराविरोधात गुन्हा नोंदवण्यात आला. तसेच आक्रमक शिवसैनिकांनी त्याचा शो जिथे झाला त्या हॉटेलची तोडफोड केली. या सर्व घटनेनंतर आता कुणालने सोशल मीडियावर एक पोस्ट शेअर करत माफी मागणार नसल्याचे स्पष्टपणे सांगितले आहे. कुणाल कामराने आपल्या इन्स्टा हँडलवरुन पोस्ट शेअर करत म्हंटले की, “एन्टरटेन्मेट वेन्यू फक्त एक प्लॅटफॉर्म आहे. सर्व प्रकारच्या शोसाठी ती एक जागा आहे. हॅबिटेट (किंवा इतर कोणतंही स्थळ) माझ्या कॉमेडीसाठी जबाबदार नाही, नाही यावर कुणाचाही कंट्रोल आहे, जे काही मी बोलतो किंवा करतो… नाही माझ्या काही बोलण्यावर किंवा कृतीवर कोणत्याही राजकीय पक्षाचा कंट्रोल आहे.
एखाद्या कॉमेडियनच्या शब्दांसाठी कोणत्याही स्थळावर हल्ला करणं तेवढाच मूर्खपणा आहे. जेवढा तुमच्या ताटात वाढण्यात आलेलं बटर चिकन तुम्हाला आवडलं नाही, म्हणून तुम्ही जाऊन टॉमेटो घेऊन जाणारा ट्रक पलटी करण्यामध्ये आहे. अभिव्यक्ती स्वातंत्र्याच्या आमच्या अधिकाराचा वापर केवळ शक्तिशाली आणि श्रीमंत लोकांची चापलूसी करण्यासाठी केला जाऊ नये, जरी आजचा मीडिया आम्हाला याचा उलट्या पद्धतीनं विश्वास देण्याचा प्रयत्न करत असला तरीसुद्धा… ”
कोणत्याही पॉवरफुल पब्लिक फिगरबाबत केलेली चेष्टा, मस्करी सहन न करण्याची तुमची असक्षमता माझ्या अधिकारांना बदलू शकत नाही. जेवढं मला माहिती आहे, कोणताही नेता आणि आपली राजकीय व्यवस्थेच्या सर्कसची खिल्ली उडवणं कायद्याच्या विरोधात नाही.”पुढे कुणालनं लिहिलंय की, माझ्याविरोधातील कोणत्याही कायदेशीर कारवाईसाठी पोलीस आणि कोर्टाला पूर्णपणे सहकार्य करण्यासाठी मी तयार आहे. पण, ज्यांना विनोदानं दुखापत झाली आणि तोडफोड केली त्यांच्याविरुद्ध कायदा निष्पक्ष आणि समानपणे लागू होईल का? आणि हे अशा लोकांसाठी देखील लागू होईल का? जे बीएमसीचे निवडून न आलेले सदस्य आहेत आणि कोणतीही पूर्वसूचना न देता हॅबिटॅटमध्ये पोहोचतात आणि हातोडा वापरतात?
पुढच्या वेळी मी एल्फिन्स्टन ब्रिजवर किंवा मुंबईतील इतर कोणत्याही ठिकाणी शो करेन, जे पाडणं खरंच गरजेचं आहे. तुम्हा सर्वांना माहीत असेलच की, अनोळखी नंबर व्हॉइसमेलवर जातात.” तसेच, कुणाल कामरानं माध्यमांनाही फटकारलं आहे. तो म्हणाला की, “संपूर्ण वाद हा एक सर्कस आहे आणि त्यामुळेच भारतात प्रेस फ्रीडम 159 व्या क्रमांकावर आहे.”पोस्टच्या शेवटी कुणालनं लिहिले की, “मी माफी मागणार नाही, मी जे बोललो तेच अजित पवार यांनी एकनाथ शिंदे यांच्याबद्दल म्हटलं होतं. मला या जमावाची भीती वाटत नाही आणि मी माझ्या पलंगाखाली लपून ही घटना शांत होण्याची वाट पाहणार नाही,” असे थेट त्याने सांगत आपली भूमिका ठामपणे स्पष्ट केली आहे.
