घाटकोपर : घाटकोपर येथे महाविकास आघाडीतर्फे संजय दिना पाटील यांच्या निवडणूक प्रचाराची सभा पार पडली. या सभेत शिवसेना उद्धव बाळासाहेब ठाकरे पक्षाच्या राज्यसभा खासदार प्रियांका चतुर्वेदी आणि नितीन बानगुडे पाटील यांनी उपस्थितांना मार्गदर्शन केलं. या सभेत बोलताना प्रियांका चतुर्वेदींनी मुख्यमंत्री एकनाथ शिंदेंबाबत वादग्रस्त वक्तव्य केलं आहे. प्रियंका चतुर्वेदींचा हा व्हिडीओ सध्या सोशल मीडियावर सध्या जोरदार व्हायरल होत आहे.
उत्तर पूर्व-मुंबईतून महाविकास आघाडीकडून संजय दिना पाटलांना लोकसभेच्या रिंगणात उतरवण्यात आलं आहे. त्याच्याच प्रचारासाठी घाटकोपरमध्ये महाविकास आघाडीतर्फे प्रचार सभेचं आयोजन करण्यात आलं होतं. या सभेसाठी शिवसेना उद्धव बाळासाहेब ठाकरे पक्षाच्या राज्यसभा खासदार प्रियांका चतुर्वेदी आणि नितीन बानगुडे पाटील उपस्थित होते. या सभेत बोलताना प्रियांका चतुर्वेदींनी महायुतीवर जोरदार टीका केली. पण टीका करताना प्रियांका चतुर्वेदींची जीभ घसरली. प्रियांका चतुर्वेदी यांनी एकनाथ शिंदे यांच्या बाबत वादग्रस्त व्यक्तव्य केलं.
