बीड : स्वराज्य शक्ती सेनेच्या अध्यक्षा करुणा शर्मा या बीड लोकसभेची निवडणूक लढवत असून त्यांना हिरा हे चिन्ह मिळालं आहे. करुणा शर्मा यांनी यापूर्वी कोल्हापूरमध्ये निवडणूक लढवली होती, त्यानंतर आता त्या बीड लोकसभेची निवडणूक लढवत आहेत. करुणा शर्मा या बीडचे पालकमंत्री धनंजय मुंडे यांच्या पत्नी आहेत. करुणा शर्मा या स्वराज्य शक्ती सेनेकडून ही निवडणूक लढवत असून बीड जिल्ह्यातील अंबाजोगाई शहरांमध्ये त्यांनी प्रचार यात्रा काढून लोकांना मत देण्यासाठी आवाहन केलं.
करुणा शर्मा या भाजपच्या लोकसभेच्या उमेदवार पंकजा मुंडे आणि राष्ट्रवादी काँग्रेसचे शरद पवार गटाचे उमेदवार बजरंग सोनवणे यांच्या विरोधामध्ये बीडमध्ये निवडणूक लढवत आहेत. सोशल मीडियाच्या माध्यमातून मागच्या अनेक दिवसापासून धनंजय मुंडे यांच्यासंदर्भात अनेक प्रश्न उपस्थित करणाऱ्या आणि आरोप करणाऱ्या करुणा शर्मा चर्चेत आल्या होत्या. या निवडणुकीतसुद्धा धनंजय मुंडे यांच्या विरोधात त्या प्रचार करताना पाहायला मिळत आहेत.
