नवी दिल्ली, 31 मार्च – भाजपला निष्पक्ष निवडणूक होऊ द्यायची नाही. त्यामुळेच निवडणुकीच्या आधी काँग्रेसची बँक खाती गोठवली.
दोन राज्यातील मुख्यमंत्र्यांना अटक केले. निवडणुकीच्या तोंडावर कारवाई करून भाजप मॅचफिक्सिंग करत असल्याचा आरोप काॅंग्रेस खासदार राहुल गांधी यांनी केला.
आय.एन.डी.आय.ए.च्या वतीने दिल्लीतील रामलीला मैदानावर ‘लोकतंत्र बचाओ महारॅली’चे आयोजन करण्यात आले होते. त्यात राहुल गांधी बोलत होते.
यावेळी व्यासपीठावर राष्ट्रवादी काॅंग्रेसचे ज्येष्ठ नेते शरद पवार, शिवसेना पक्षप्रमुख उद्धव ठाकरे, आदित्य ठाकरे, समाजवादी प्रमुख अखिलेश यादव, भाकपचे सरचिटणीस सीताराम येचुरी, आप नेते आतिशी, गोपाल राय, पीडीपी प्रमुख मेहबुबा मुफ्ती आणि नॅशनल कॉन्फरन्सचे नेते फारुख अब्दुल्ला आदी उपस्थित आहेत.
या रॅलीत सहभागी होण्यासाठी दिल्लीचे मुख्यमंत्री अरविंद केजरीवाल यांच्या पत्नी सुनीता केजरीवाल आणि झारखंडचे माजी मुख्यमंत्री हेमंत सोरेन यांच्या पत्नी कल्पना सोरेनही पोहोचल्या आहेत.
गांधी पुढे म्हणाले, इथे मॅच फिक्सिंग होत आहे हे लक्षात ठेवा. या निवडणुकीत काहीतरी गडबड आहे, असे हे भाजपवाले सांगत आहेत. असे भाजपच्या एका नेत्याने म्हटले आहे. त्यांच्याच दोन लोकांना निवडणूक आयोगात आणले. आमच्या दोन मुख्यमंत्र्यांना तुरुंगात टाकले.
हे करायचे असते तर ते सहा महिन्यांपूर्वी, वर्षभरापूर्वी करता आले असते. तुम्हाला आमची खाती गोठवायची असल्यास, तुम्ही ते सहा महिन्यांपूर्वी करायला हवे होते.
पण तुम्हाला ते आता करायचं होतं, जेणेकरून मॅच फिक्सिंग होऊ शकतं. माझे लक्षपूर्वक ऐका. जर भाजप जिंकला आणि त्यांनी संविधान बदलले तर संपूर्ण देश पेटणार आहे, हा देश टिकणार नाही. ही निवडणूक मतांसाठीची निवडणूक नाही, ही निवडणूक भारताला वाचवण्याची निवडणूक आहे.
त्यांना राज्यघटना का मिटवायची आहे, कारण त्यांना तुमचा पैसा हिसकावून घ्यायचा आहे. मी जनगणना आणि रोजगार याविषयी बोललो, कारण या देशासमोरील सर्वात मोठ्या समस्या आहेत. त्यामुळे तुम्ही लोकांनी सर्व शक्तीनिशी मतदान केले नाही तर त्यांचे मॅच फिक्सिंग यशस्वी होईल आणि देशाचे संविधान नष्ट होईल.
हे संविधान आहे, पोलिस आणि धमक्या देऊन चालणार नाही. त्यांना वाटते की संविधानाशिवाय देश धमक्या देऊन, सीबीआय, ईडीने चालवता येईल. तुम्ही मीडिया विकत घेऊ शकता, मीडिया रिपोर्ट्स बंद करू शकता पण लोकांचा आवाज दाबू शकत नाही. कोणतीही शक्ती हा आवाज दाबू शकत नाही.
काँग्रेस हा देशातील सर्वांत मोठा विरोधी पक्ष आहे. पण आमची खाती गोठवण्यात आली आहेत. आम्हाला पोस्टर छापावे लागतील, राज्यांमध्ये कामगार पाठवावे लागतील, पण आमची खाती गोठवली गेली आहेत, त्यामुळे आम्ही ते करू शकत नाही.
मॅच फिक्सिंगचा हा पूर्ण प्रयत्न आहे. हे मॅच फिक्सिंग फक्त पंतप्रधान मोदीच करत नाहीत तर ते देशातील ३-४ बडे अब्जाधीश करत आहेत. या मॅच फिक्सिंगचा एकच उद्देश आहे की, या देशाच्या संविधानाने या देशातील जनतेला जगण्याचा अधिकार दिला आहे तो हिरावून घेण्यासाठी हे मॅच फिक्सिंग केले जात आहे. ज्या दिवशी ही राज्यघटना संपुष्टात येईल त्या दिवशी हा देश टिकणार नाही, असेही गांधी म्हणाले.
