नवी मुंबई – नवी मुंबईतील मेट्रो प्रवाशांसाठी मोठी खुशखबर आहे. ७ सप्टेंबर २०२४ पासून मेट्रोच्या तिकीटांत ३३% कपात करण्यात येणार आहे. यानुसार, किमान तिकीट दर रु. १० आणि कमाल दर रु. ३० असे असणार आहेत. याआधी, बेलापूर ते पेंधर या मार्गावर तिकीट दर रु. ४० होता, जो आता कमी करून रु. ३० केला आहे. सुधारित दरांनुसार, ० ते २ कि.मी. आणि २ ते ४ कि.मी. प्रवासासाठी तिकीट दर रु. १०, ४ ते ६ कि.मी. आणि ६ ते ८ कि.मी. साठी रु. २० आणि ८ ते १० कि.मी. आणि त्यापुढील अंतरासाठी रु. ३० असे असतील. सिडकोच्या मते, हा निर्णय जलद आणि आरामदायी प्रवासासाठी अधिक प्रवाशांना प्रेरित करेल. मेट्रोच्या सेवेला वाढलेला प्रतिसाद लक्षात घेता, तिकीट दर कमी करून अधिक लोकांना फायदा मिळवण्याचा उद्देश आहे. सिडकोचे उपाध्यक्ष आणि व्यवस्थापकीय संचालक विजय सिंघल यांनी सांगितले की, “सुधारित तिकीट दरांमुळे नवी मुंबईतील मेट्रो सेवेला अधिक चांगला प्रतिसाद मिळेल. प्रवाशांना अधिक आरामदायक आणि कमी खर्चीला प्रवास करता येईल.” सदर निर्णयामुळे, नवी मुंबईतील मेट्रो प्रवास अधिक लोकप्रिय होईल आणि लोकलच्या तुलनेत मेट्रोला प्राधान्य मिळवता येईल, असे अपेक्षित आहे.
