सोलापूर – अनंत चतुदर्शीच्या मुहूर्तावर आज राज्यभरात लाडक्या गणपती बाप्पाला निरोप दिला जात आहे. आज सकाळपासून राज्याच्या विविध भागांमध्ये सार्वजनिक मंडळाचे गणपती विसर्जनसाठी मंडप सोडून बाहेर पडले आहेत. त्यामुळे आज दिवसभर राज्यभरात मिरवणुकांचा उत्साह दिसून येत आहे. मात्र, या आनंदावर विरजण पडणारी घटना पंढरपूरमध्ये घडली आहे. पंढरपूर शहरातील डॉल्बी मालक अमोल खुटाले हा शेगाव दुमाला येथे गणेश विसर्जन मिरवणुकीसाठी डॉल्बी साऊंड जोडत असताना या तरुणाला अचानक चक्कर आली आणि अमोल कोसळला. मेंदूत रक्तस्त्राव झाल्याने रुग्णालयात उपचार सुरू असताना अमोल खुटाले यांचा दुर्दैवी मृत्यू झाला आहे. या घटनेनंतर पंढरपूर शहरातील सर्वात मोठे मंडळ असणाऱ्या श्रीमंत लोकमान्य मंडळाने आपल्या कार्यकर्त्याचा मृत्यू झाल्याने गणेश विसर्जन मिरवणूक रद्द केली आहे. अमोल खुटाले यांचा मृत्यू झाल्याने पंढरपूरवर शोककळा पसरली आहे.
