अमरावती : दिवाळीच्या सुट्टीचा आनंद एसटी प्रवाश्यांना घेता यावा याकरीता पुणे येथून अमरावतीकडे येणाऱ्या प्रवाश्यांच्या सुविधेकरीता अतिरिक्त बसेसचे नियोजन एसटी महामंडळाच्या वतीने करण्यात आले आहे. पुणे येथून येण्याकरीता २७ ते ३१ ऑक्टोबर व अमरावती येथून जाण्याकरीता ३ ते १० नोव्हेंबर दरम्यान ५० अतिरिक्त बसेस म्हणजेच १०० फेऱ्या होणार आहे. दरवर्षी दिवाळीत मोठ्या प्रमाणात प्रवाश्यांची गर्दी होत असते. यामध्ये पुणे येथे शिकत असलेल्या विद्यार्थ्यांसह कामानिमित्य नोकरीत असलेल्या प्रवाश्यांची अधिक संख्या असल्याने ते दिवाळीच्या सुट्टीत गावाकडे परतात.
परंतु खासगी बसचालक याचा फायदा घेत अव्वाच्या सव्वा तिकिट दर आकारून त्यांची आर्थिक लुट करतात. अशा करण्य प्रवाशांना सुविधा देण्याकरीता दरवर्षी एसटी महामंडळाच्या वतीने पुणे या मार्गावर अतिरिक्त बसेस सोडल्या जातात. मागील वर्षी या मार्गावर ४५ अतिरिक्त बसेस सोडण्यात आल्या होत्या. यंदा मात्र प्रवाश्यांची मागणी पाहता पुणे येथुन येण्याकरीता ५० अतिरिक्त बसेसचे नियोजन एसटी महामंडळाच्या वतीने करण्यात आले आहे.
पुणे येथील कॅन्टोनमेंट बोर्ड मैदान खडकी येथून २७ ते ३१ ऑक्टोबर दरम्यान बसेस अमरावतीकरीता रवाना होणार आहे. तर अमरावती येथुन ३ ते १० नोव्हेंबर पर्यंत पुणे करीता ५० बसेस सोडल्या जाणार आहे. या व्यतिरिक्त यवतमाळ, अकोला, वर्धा, चंद्रपुर, वाशिम आधी ठिकाणी देखील प्रवाश्यांची संख्या वाहून अतिरिक्त बसेस सोडल्या जाणार आहे. याकरीता ऑनलाईन आरक्षणाची सुविधा करण्यात आली असुनआतापर्यंत २१ बसेसचे पुणे येथुन अमरावतीकरीता बुकींग करण्यात आले आहे. त्यामुळे प्रवाश्यांनी ऑनलाईन आरक्षण करण्याचे आवाहन विभाग नियंत्रक निलेश बेलसरे यांनी केले आहे.
अशी करा ऑनलाईन बुकींग
शिवशाही व साधारण बसेसची पुणे व अमरावती येथून देखील ऑनलाईन बुकींगची सुविधा एसटी महामंडळाच्या वतीने करण्यात आली आहे. ऑनलाईन बुकींगरेडबसतसेच अॅप्सवर राज्यपरिवहन विभागाच्या वेबसाईटवर जावून करता येणार आहे. याकरीता सांकेतिक कोड देण्यात आला आहे. पुणे करीता पीसीएनटी व अमरावती करीता एएमटी कोड चा वापर कराता येणार आहे.
