नितीन सावंत
गेल्याच आठवड्यात देशाचे गृहमंत्री अमित शहा महाराष्ट्र दौऱ्यावर आले होते. विशेष म्हणजे यावेळी अमित शहा यांनी शिवछत्रपतींची राजधानी रायगड किल्ल्यावर भेट देऊन शिवाजी महाराज हे कुणा एका पक्षाचे दैवत नसून आमचेही आहे असे ठासून सांगण्याचा प्रयत्न केला. शिवसेनेची उभारणी ही छत्रपती शिवाजी महाराजांच्या विचारांवर झाली असा भाजपचा समज असल्याने वारंवार त्यांना सांगावे लागत आहे की शिवाजी महाराज हे आमचेही दैवत आहे. यापूर्वी भाजपच्या कार्यक्रमात जय भवानी जय शिवाजी किंवा शिवछत्रपती शिवाजी महाराज की जय या घोषणा दिल्या जात नसत मात्र हल्ली भाजपच्या कार्यक्रमात किंवा समारंभात या घोषणा वारंवार दिल्या जात आहेत.
शिवसेना हा पक्ष शिवछत्रपती शिवाजी महाराजांच्या विचारांवर चालत असला तरी त्याची संघटनात्मक बांधणी शिवसेनाप्रमुख बाळासाहेब ठाकरे यांनी १८ पगड जातींना एकत्र घेऊन केल्याने आणि ही संघटनात्मक बांधणी तळागाळापर्यंत पोहोचल्याने उद्धव ठाकरे यांच्या शिवसेनेचे आव्हान हे काही कमी झालेले नाही एकनाथ शिंदे आणि त्यांच्या ४० शिलेदारांना फोडून भाजपने शिवसेना ताब्यात घेण्याचा प्रयत्न केला असला तरी संघटना ही एकनाथ शिंदे यांच्या पाठीशी नसल्याचे भाजपच्या शीर्षस्थ नेत्यांच्या लक्षात आले आहे. लोकसभेतील राज्यातील यशानंतर भाजप नेते अस्वस्थ होते. परंतु विधानसभेत लाडक्या बहिणीने भाजप प्रणित महायुतीला हात दिल्याने महायुतीतील तिन्ही पक्षांचा विजय सोपा झाला. विधानसभेत भाजपला अपेक्षेपेक्षा मोठे यश मिळाल्याने त्यांना आता अजित दादा आणि एकनाथ शिंदे यांची गरज उरलेली नाही. मात्र अजित दादा आणि मुख्यमंत्री देवेंद्र फडणवीस यांचे संबंध मधुर असल्याने त्यांचा कारभार व्यवस्थित चालला आहे. परंतु गेल्या अडीच वर्षातील एकनाथ शिंदे यांची कामगिरी चांगली असली तरी त्यांनी फडणवीस आणि अजित दादा यांच्याशी असलेले संबंध सौहार्दपूर्ण ठेवण्यास ते यशस्वी झाले नाहीत. त्यामुळे आता फडणवीस आणि अजित दादा उपमुख्यमंत्री एकनाथ शिंदे यांना एकटे पाडण्यात यशस्वी झाले आहेत.
हाता तोंडाशी आलेले मुख्यमंत्रीपद गेल्यानंतर एकनाथ शिंदे गेले चार महिने अस्वस्थ आहेत. राज्यात फडणवीस यांचे सरकार आल्यानंतर अमित शहा यांनी दोन भेटी दिल्या. या दोन्ही भेटींमध्ये एकनाथ शिंदे यांनी आपली बाजू केंद्रीय गृहमंत्री अमित शहा यांच्यापुढे मांडली. परंतु अद्यापही शिंदे यांना न्याय मिळाला असे वाटत नाही. यापूर्वी पहिल्या भेटीत आपल्याला न मिळालेल्या मुख्यमंत्री पदाबाबत एकनाथ शिंदे यांनी जाब विचारला. परंतु पंतप्रधान मोदी आणि गृहमंत्री अमित शहा यांना स्वपक्षीय ही जाब विचारत नाहीत तर एकनाथ शिंदे कसे विचारू शकतात? त्यामुळे थंड डोक्याने अमित शहा यांनी एकनाथ शिंदे यांच्या प्रश्नाकडे दुर्लक्ष केले आहे. या भेटीनंतर उपमुख्यमंत्री एकनाथ शिंदे यांचे खाजगी पीए सचिन जोशी यांना ईडीची नोटीसही आली. १८ फेब्रुवारी २०२५ रोजी त्यांना मुंबईतील इडी कार्यालयात दिवसभर बसवून ठेवण्यात आले. त्यानंतर आपल्या बाबत काय चालले आहे हे एकनाथ शिंदे यांच्या लक्षात यायला हवे होते. परंतु ती गोष्ट त्यांच्या लक्षात आली की नाही हे तेच जाणोत.
उपमुख्यमंत्री एकनाथ शिंदे आणि त्यांच्या मंत्र्यांना अधिकारी वर्ग विशेषता आयएएस अधिकारी दाद देत नाहीत. खात्याचे अधिकारी किंवा सचिव फोनही उचलत नाहीत किंवा रिप्लायही देत नाहीत असा अनुभव शिंदे सेनेच्या अनेक मंत्र्यांना आला आहे. त्यासाठी एकनाथ शिंदे यांनी पंधरा दिवसापूर्वी एका विभागाची बैठकही लावली होती. परंतु या बैठकीतून फार काही निष्पन्न झाले नाही कारण या बैठकीस स्वतः मुख्यमंत्री फडणवीस उपस्थित होते. आयएएस अधिकारी मुख्यमंत्र्यांशिवाय फारसे कोणाला गिनत नाहीत. त्यामुळे मुख्यमंत्र्यांच्या इशारावरूनच हे चालले असावे असा एकनाथ शिंदे यांचा ग्रह आहे.
रायगडच्या पालकमंत्री पदावरून अजितदादा यांच्या राष्ट्रवादी काँग्रेस आणि शिंदे सेनेमध्ये जोरदार वाद सुरू आहे. रायगड जिल्हा हा पुढील तटकरे यांच्या ताब्यातून काढून घेण्याचा प्रयत्न अनेक दिवस शिंदे सेनेचे आमदार करत आहेत. परंतु त्यात त्यांना फारसे यश आलेले नाही. यावेळी केंद्रीय गृहमंत्री अमित शहा यांनी सुनील तटकरे यांच्या घरी पाहुणचार घेतल्याने स्वतः उपमुख्यमंत्री एकनाथ शिंदे आणि रायगड जिल्ह्यातील त्यांचे शिलेदार अस्वस्थ आहेत. त्यामुळे रायगडचे पालकमंत्री तटकरे कुटुंबीयांनाच मिळणार यावर शिक्कामोर्तब झाल्याचे शिंदे सेनेचे आमदार सांगत आहेत.
अमित शहा यांच्या रायगड दौऱ्यात ही उपमुख्यमंत्री एकनाथ शिंदे यांनी त्यांची स्वतंत्रपणे भेट घेतली. या भेटीत नवीन तक्रार होती. आपल्या मंत्र्यांचे अधिकारी ऐकत नाहीत आणि अजित दादा पवार यांच्याकडे अर्थ खाते असल्याने आपल्या समर्थक आमदारांना निधी मिळण्यास अडचणी येत आहेत. या तक्रारीत तथ्य असले तरी अमित शहा एकनाथ शिंदे यांच्या तक्रारींची फारशी दखल घेतील असे वाटत नाही. आता एकनाथ शिंदे यांच्याकडे आहे त्या परिस्थितीतून मार्ग काढणे एवढाच पर्याय शिल्लक आहे.
नितीन सावंत, ९८९२५१४१२४
