चंदीगड – पंजाबच्या अमृतसर येथील आंतरराष्ट्रीय सीमेवर सीमा सुरक्षा दलाना (बीएसएफ) सोमवारी रात्री एका पाकिस्तानी घुसखोराला कंठस्नान घातले.बीएसएफच्या जनसंपर्क अधिकाऱ्याने आज, मंगळवारी सांगितले की, पंजब सीमेवर तैनात असलेल्या बीएसएफच्या जवानांना 16 सप्टेंबरच्या मध्यरात्री गुप्तपणे आंतरराष्ट्रीय सीमा ओलांडणाऱ्या पाकिस्तानी घुसखोराच्या संशयास्पद हालचाली लक्षात आल्या. अंधाराचा फायदा घेत घुसखोराने अमृतसर जिल्ह्यातील रतनखुर्द गावाजवळील सीमाभागातील सीमा सुरक्षा कुंपणाच्या दिशेने जाण्यास सुरुवात केली. दरम्यान, बीएसएफ जवानांनी घुसखोराला तत्काळ आव्हान दिले पण तो सीमेवरील सुरक्षा कुंपणाकडे पुढे जात राहिला आणि आक्रमक हावभाव दाखवू लागला. यावर ड्युटीवर असलेल्या सतर्क जवानांनी घुसखोरावर गोळी झाडून त्याला जागीच ठार केले. त्याच्या ताब्यातून 270 रुपये पाकिस्तानी चलन आणि 10 रुपयांची अर्धी फाटलेली पाकिस्तानी नोट जप्त करण्यात आली आहे. सुरक्षा कर्मचाऱ्यांनी पाकिस्तानी घुसखोराचा मृतदेह पुढील कारवाईसाठी घरिंडा पोलिस ठाण्याच्या ताब्यात दिला आहे.
