ढाका : बांगलादेशच्या हवाई दलाच्या तळावर मोठा हल्ला झाला आहे. सोमवारी (२४ फेब्रुवारी) कॉक्स बाजार शहरातील हवाई दलाच्या तळावर काही हल्लेखोरांनी हल्ला केला, ज्यामध्ये एक जणाचा मृत्यू झाला. याप्रकरणी हल्ल्यानंतर हवाई दलाच्या कर्मचाऱ्यांनी कारवाई केली. हवाई दलाने केलेल्या कारवाईमध्ये अनेक लोक जखमी झाले झाल्याचे वृत्त आहे.
बांगलादेश लष्कराची मीडिया विंग इंटर-सर्व्हिसेस पब्लिक रिलेशन्स (ISPR) ने सांगितले की, हा हल्ला जवळच्या समिती पारा भागातील काही हल्लेखोरांनी केला. यानंतर, लष्कराने तात्काळ परिस्थिती नियंत्रणात आणली. जखमींना रुग्णालयात दाखल करण्यात आले. बांगलादेशी माध्यमांनुसार, परिस्थिती हाताळण्यासाठी हवाई दल आवश्यक पावले उचलत आहे. दरम्यान, सोमवारी दुपारी १२ वाजण्याच्या सुमारास घडलेल्या या घटनेत एकाचा मृत्यू झाला आणि अनेक जण जखमी झाले, असे कॉक्स बाजारचे उपायुक्त मोहम्मद सलाहुद्दीन यांनी सांगितले. दुसरीकडे, दोन गटातील हाणामारीमुळे ही घटना घडल्याचे सांगितले जात आहे.
कॉक्स बाजार जिल्हा सदर रुग्णालय पोलिस चौकीचे प्रभारी सैफुल इस्लाम यांनी सांगितले की, स्थानिक व्यापारी शिहाब कबीर यांना गोळ्या घालून ठार मारण्यात आले.हा तरुण समिती पारा येथील रहिवासी होता. कॉक्स बाजार सदर रुग्णालयाचे निवासी वैद्यकीय अधिकारी साबुकतिगीन महमूद शोहेल यांनी सांगितले की, तरुणाला मृतावस्थेत रुग्णालयात आणण्यात आले. त्याच्या डोक्याच्या मागच्या बाजूला गंभीर दुखापत झाली होती. मात्र, मृत्यूचे खरे कारण शवविच्छेदनानंतरच स्पष्ट होईल.
स्थानिक माध्यमांनुसार, बांगलादेशी सैन्य कोणालाही घटनास्थळी जाऊ देत नाहीत. सुरक्षा दलांनी परिसराला वेढा घातला असून तपास सुरु आहे. यामुळे संपूर्ण परिसरात तणावपूर्ण परिस्थिती आहे. प्रशासनाने स्थानिकांना शांतता राखण्याचे आवाहन केले आहे. दरम्यान, या हल्ल्याची जबाबदारी अद्याप कोणत्याही संघटनेने स्वीकारलेली नाही. सुरक्षा संस्था हल्लेखोरांची ओळख पटवून त्यांचा हेतू शोधण्याचा प्रयत्न करत आहेत.
गेल्या वर्षी ५ ऑगस्ट रोजी विद्यार्थ्यांच्या हिंसक निदर्शनांनंतर शेख हसीना यांना देश सोडावा लागला होता. तीन दिवसांनंतर, ८ ऑगस्ट रोजी, मोहम्मद युनूस यांनी बांगलादेशचा कार्यभार स्वीकारला. पण त्यांच्या राजवटीत बांगलादेश हिंसाचाराच्या विळख्यात सापडला आहे. देशातील ४८ जिल्ह्यांमध्ये हिंदूंवर सुनियोजित हल्ले करण्यात आले. यानंतर महिला आणि मुलांवरील लैंगिक हिंसाचाराच्या घटना वाढल्या. आता एअरबेसवरील हल्ल्याचे प्रकरण समोर आले आहे
