नाशिक : भारतीय प्रशासकीय सेवेतून (आयएएस) बडतर्फ प्रशिक्षणार्थी पूजा खेडकरच्या नॉन क्रिमिलेअर प्रमाणपत्र प्रकरणाची येथील विभागीय आयुक्त कार्यालयात सुनावणी सुरू आहे. पूजा खेडकर उपस्थित नसल्याने तिचे वडील दिलीप खेडकर वकिलासह उपस्थित होते. या प्रकरणाची पुढील सुनावणी दीड आठवड्यानी होणार असल्याची माहिती प्राप्त होत आहे. पूजा खेडकरला ‘नॉन क्रिमिलेअर’ प्रमाणपत्र रद्द का करू नये, अशा आशयाची कारणे दाखवा नोटीस नाशिक विभागीय आयुक्त कार्यालयाने बजावली होती. त्यानुसार, मंगळवारी पूजाचे वडील दिलीप खेडकर यांनी वकिलामार्फत म्हणणे मांडले.
या प्रकरणाची पुढील सुनावणी दीड आठवड्यानी होणार आहे. नॉन क्रिमिलेअरसाठी उमेदवाराच्या पालकांचे उत्पन्न वार्षिक आठ लाख रुपयांपेक्षा अधिक नसावे अशी अट आहे. खेडकर यांनी अहिल्यानगर जिल्ह्यातील पाथर्डीच्या प्रांताधिकाऱ्यांकडून तत्कालीन नॉन क्रिमिलेअर प्रमाणपत्र मिळवले होते. तिचे वडील दिलीप खेडकर निवृत्त शासकीय अधिकारी आहेत. त्यांनी नुकतीच लोकसभा निवडणूक लढवली होती. यावेळी सादर केलेल्या प्रतिज्ञापत्रात त्यांनी ४० कोटींची मालमत्ता जाहीर केली होती. पूजाचे प्रमाणपत्र वादात सापडल्यानंतर स्थानिक प्रशासनाने केलेल्या छाननीत खेडकर कुटुंबीयांच्या नावे कोट्यवधींची मालमत्ता असल्याचे उघड झाले. दिशाभूल करून हे प्रमाणपत्र मिळविल्याचा गोपनीय अहवाल स्थानिक प्रशासनाने सादर केल्याची माहिती प्राप्त होत आहे. खेडकरला आपले म्हणणे मांडण्यास पुरेशी संधी देऊन महिनाभरात अंतिम निर्णय घेतला जाईल, अशी माहिती प्राप्त होत आहे.
