लेह – लद्दाखची राजधानी असलेल्या लेहमध्‍ये आज, गुरुवारी बस दरीत कोसळून झालेल्‍या भीषण अपघातात 6 जणांचा मृत्यू झाला असून 22 प्रवासी जखमी झाले आहेत. लेहमधील दुर्बुक भागात ही दुर्घटना घडली. अपघाताची माहिती मिळताच मदत पथकाने घटनास्‍थळी धाव घेत जखमींना रुग्णालयात दाखल केले.
अपघातग्रस्त बसमध्ये 2 मुले आणि 23 शालेय कर्मचाऱ्यांसह एकूण 25 प्रवासी होते. शाळेतील आपल्‍या सहकार्‍याच्या लग्नात सहभागी होण्यासाठी सर्वजण दुर्बुकला जात होते. एका वळावर बस खोल दरीत कोसळली. जखमींना लष्कर आणि सीएचसी तांगत्से आरोग्य सेवा केंद्रात दाखल करण्यात आले आहे, अशी माहिती लेहच्या उपायुक्तांनी दिली.जखमींना लेह येथील जिल्हा रुग्णालयात नेण्यासाठी प्रशासनाने 3 हेलिकॉप्टर तैनात करण्यात आले आहेत.
