मिझोराम – मिझोराममधील आयझोलच्या दक्षिणेकडील भागातील एक दगडाची खाण खचल्याने झालेल्या अपघातात ७ जणांचा मृत्यू झाला असून अनेक जण बेपत्ता झाल्याची माहिती मिझोरामच्या पोलिस अधिकाऱ्यांनी दिली आहे.
मिझोराममध्ये काल पासून जोरदार पाऊस सुरु असल्याने अनेक ठिकाणी भुस्खलनाच्या घटना घडल्या आहेत. त्यातच ही दगडाची खाण खचल्याने खाणीत काम करत असणाऱ्या ७ जणांचा मृत्यू झाला असून अनेक जण बेपत्ता झाले आहेत. या खाणीच्या ठिकाणी बचाव दलाचे पथक बचाव कार्य करत आहेत. पावसामुळे नद्यांच्या पातळीत वाढ झाल्यामुळे ही खाण खचल्याचे म्हटले जात आहे.
मिझोराममध्ये नदी किनारी राहणाऱ्या लोकांना सुरक्षित स्थळी हलवण्यात आलेले आहे. त्याचप्रमाणे सर्व शाळा व महाविद्यालये पुढील काही दिवस बंद करण्यात आली आहेत. प्रशासनाने राज्य सरकारच्या कर्मचाऱ्यांव्यतिरिक्त इतर खाजगी कर्मचाऱ्यांना घरीच राहण्याच्या सूचना दिल्या आहेत.
