सोलापूर : आज वसंत पंचमी अर्थात श्री विठ्ठल रुक्मिणी मातेच्या विवाह सोहळ्यानिमित्त पंढरपुरात हजारोंच्या संख्येने भक्तांची मांदियाळी आहे हरिनामाच्या गजरात लग्नासाठी आलेली भक्त वऱ्हाडी मंडळी डोलू लागली आहेत. लग्न घटिका समीप आली आहे. विठ्ठल मंदिराच्या बाहेर हजारोंच्या संख्येने भाविक देवाच्या डोक्यावर अक्षता टाकण्यासाठी एकत्र आले आहेत. विवाहासाठी विठ्ठल रुक्मिणीच्या प्रतीकात्मक मूर्ती दाखल करण्यात आल्या आहेत .आषाढी एकादशी सारखे रूप विठ्ठल मंदिराला आले आहे. परिसरात हजारोंच्या संख्येने भक्त लग्न सोहळा पाहण्यासाठी आले आहेत .मंदिर परिसरात पाय ठेवायला ही जागा नाही. विवाह सोहळ्यापूर्वी भजन कीर्तन करत महिलांनी फेर धरला आहे. फुगड्या घालत मंदिर परिसर जल्लोष आणि गजबजला आहे. वसंत पंचमीच्या शुभ मुहूर्तावर आज श्री विठ्ठल रुक्मिणी मातेचा शाही विवाह सोहळा दुपारी संपन्न होत आहे.श्रींचा गाभारा, विठ्ठल सभामंडप, श्री संत नामदेव महाराज पायरी, उत्तर द्वार , सोळखांबी, रुक्मिणी सभामंडप, मिरवणूक रथ या ठिकाणी सजावट करण्यात आली आहे. याकरिता सुमारे १०० कारागिरांनी रात्रभर परिश्रम घेतले आहेत.
