अश्विनी वैष्णव यांनी केले विमानतळावर स्वागत
नवी दिल्ली : अमेरिकेचे उपाध्यक्ष जे.डी. वेंस आज, सोमवारी सपत्नीक भारताच्या दौऱ्यावर आलेत. वेंस यांच्यासोबत त्यांची ३ मुले देखील आली आहेत. केंद्रीय मंत्री अश्विनी वैष्णव यांनी दिल्लीच्या पालम विमानतळावर जाऊन जे.डी. वेंन्स आणि त्यांच्या कुटुंबियांचे स्वागत केले. विमानतळावर उतरल्यानंतर जे.डी. वेंस त्यांच्या पत्नी उषा आणि मुले थेट अक्षरधाम मंदिरात गेले. वेंस यांच्या पत्नी भारतीय वंशाच्या असून भारत भेटीदरम्यान वेंस यांच्या मुलांनी कुर्ता-पैजमा असा भारतीय पोशाख परिधान केला होता.
वेंस हे ४ दिवसांच्या दौऱ्यावर आले आहेत. भारत आणि अमेरिकेमध्ये व्यापार करार होण्याची शक्यता आहे. यामुळे भारताला ट्रम्प यांच्या ट्रेड वॉरपासून आपला बचाव करता येणार आहे. मोदींची भेट झाल्यानंतर २२ एप्रिल रोजी वेंस कुटुंबीय जयपूरला जाणार आहेत. तिथे आमेर किल्ला, अन्य ऐतिहासिक वास्तूंना भेट देणार आहेत. सायंकाळी ते राजस्थानमध्ये एका छोटेखानी सभेला संबोधित करणार आहेत. यामध्ये राजनयिक, धोरण तज्ञ आणि सरकारी अधिकारी यांचा समावेश असणार आहे. त्यानंतर बुधवारी २३ तारखेला ते आग्रा शहराला भेट देणार असून
तिथे ते ताजमहल, शिल्पग्रामला भेट देणार आहेत. त्यानंतर ते पुन्हा ते जयपूरला येणार आहेत. यानंतर २४ एप्रिल रोजी सकाळी १०.३० वाजता ते अमेरिकेला प्रयाण करणार आहेत. जेडी वेंस यांची पत्नी उषा या भारतीय वंशाच्या आहेत. त्या मुळच्या आंध्र प्रदेशच्या आहेत. उषा या पेशाने वकील आहेत. उषाचे आईवडील पश्चिम गोदावरी आणि कृष्णा जिल्ह्यातील तेलुगू ब्राह्मण आहेत. उषा यांचे आजोबा, चिलुकुरी रामा शास्त्री, आयआयटी मद्रासमध्ये भौतिकशास्त्र शिकवायचे. आता ही संस्था त्यांच्या स्मृतीप्रित्यर्थ विद्यार्थी पुरस्कार चालवते.
