पंतप्रधानांच्या रशिया दौऱ्यापूर्वी झाली महत्त्वाची घडामोड
नवी दिल्ली : भारत आणि चीन यांच्या दरम्यान असलेल्या प्रत्यक्ष नियंत्रण रेषेवर (एलएसी) पुन्हा गस्त सुरू करण्याबाबत दोन्ही देशांमध्ये नवा करार करण्यात आलाय. हा करार डेपसांग आणि डेमचोक भागात गस्त घालण्याशी संबंधीत असल्याची माहिती परराष्ट्र सचिव विक्रम मिसरी यांनी दिली. पंतप्रधान मंगळवारपासून 16 व्या ब्रिक्स परिषदेसाठी रशियाच्या दौऱ्यावर जाणार आहेत. त्यापूर्वी ही मोठी घडामोड आहे. ब्रिक्स परिषदेच्या निमित्ताने चीनचे अध्यक्ष शी जिनपिंग आणि पंतप्रधान मोदी यांच्यात द्विपक्षीय चर्चेच्या शक्यतेवर विक्रम मिसरी म्हणाले की, गेल्या काही दिवसांपासून भारत आणि चीनमध्ये राजनैतिक आणि लष्करी चर्चा सुरू आहे. एलएसी मुद्द्यांवर आमचा चीनशी करार आहे.
सैन्य मागे घेण्यासाठी आणि परिस्थितीचे निराकरण करण्यासाठी गस्तीची व्यवस्था करण्यात आली आहे. द्विपक्षीय चर्चेच्या मुद्द्यावर आम्ही अजूनही वेळ आणि वचनबद्धतेनुसार काम करत आहोत. दोन्ही देशांच्या अधिकाऱ्यांमध्ये नुकत्याच झालेल्या चर्चेनंतर भारत आणि चीनमध्ये पूर्व लडाखमधील प्रत्यक्ष नियंत्रण रेषेवर गस्त घालण्यासाठी करार झाला आहे. गस्तीबाबतच्या करारानंतर दोन्ही देशांमधील एलएसीवरील तणाव कमी होण्याची अपेक्षा आहे. वास्तविक नियंत्रण रेषेवरील उर्वरित समस्या सोडवण्यासाठी भारतीय आणि चिनी वाटाघाटी गेल्या काही आठवड्यांपासून सुरू संपर्कात असल्याचे मिसरी यांनी सांगितले.पूर्व लडाखमधील गलवान खोऱ्यात 15-16 जून 2020 रोजी भारतीय आणि चिनी सैनिकांमध्ये चकमक झाली होती. या घटनेनंतर दोन्ही देशांमधील संबंध बिघडले. पण, आता हा वाद संपुष्टात येण्याची चिन्हे आहेत.
