मुंबई – उपमुख्यमंत्री देवेंद्र फडणवीस यांनी उद्धव ठाकरे यांना 1999 पासून मुख्यमंत्री होण्याचं स्वप्न पडत होतं, अशी टीका केली. यावरून शिवसेना ठाकरे गटाचे खासदार संजय राऊत यांनी देवेंद्र फडणवीस यांच्यावर जोरदार टीका. देवेंद्र फडणवीस हे राजकारणातले कच्चे मडके असल्याचा खोचक टोला संजय राऊतांनी लगावला. आता संजय राऊत यांच्या टीकेला भाजपाच्या महिला प्रदेशाध्यक्षा चित्रा वाघ यांनी जोरदार प्रत्युत्तर दिले आहे.
उद्धव ठाकरे यांना 1999 पासूनच मुख्यमंत्री होण्याची स्वप्ने पडत होती. पण त्यांचं नाव मुख्यमंत्रीपदाच्या स्पर्धेत येत नसल्याने त्यांनी अपक्षांच्या मागण्यांकडे दुर्लक्ष द्यायला सुरुवात केली, असा गौप्यस्फोट उपमुख्यमंत्री देवेंद्र फडणवीस यांनी केला. यामुळे राजकीय वर्तुळात मोठी खळबळ उडाली. देवेंद्र फडणवीसांच्या गौप्यस्फोटावर संजय राऊत म्हणाले की, आम्हाला स्वप्न पडत नाहीत. आमची स्वप्न ही राष्ट्राच्या हिताची असतात. तुम्हाला जो स्वप्नातला आजार झाला होता, तो आता हळूहळू दूर व्हायला सुरुवात झाली. देवेंद्र फडणवीस यांना फार गांभीर्याने घेऊ नका. ते राजकारणातले एकदम कच्चे मडके आहे, असे संजय राऊत यांनी म्हटले.
