इंदापूर : महाराष्ट्रातील विधानसभा निवडणुकीचे वातावरण तापले आहे. उमेदवारी अर्ज मागे घेण्यासाठी केवळ एकच दिवस उरला आहे. महाविकास आघाडी आणि महायुती या दोन्ही प्रमुख आघाड्यांसमोर बंडखोर उमेदवारांचे प्रश्न गंभीर बनले आहेत. विविध मतदारसंघांत अनेक उमेदवार अद्यापही बंडखोरीची भूमिका घेऊन निवडणुकीच्या रिंगणात आहेत, त्यामुळे प्रमुख पक्षांची डोकेदुखी वाढली आहे.
इंदापूरमधील राष्ट्रवादी शरद पवार गटाचे उमेदवार हर्षवर्धन पाटील यांनाही अशाच राजकीय आव्हानांचा सामना करावा लागत आहे. अलिकडेच पाटील यांनी राष्ट्रवादी शरद पवार गटात प्रवेश करून इंदापूरमधून विधानसभेची उमेदवारी मिळवली. मात्र त्यांच्या उमेदवारीमुळे पक्षातील काही वरिष्ठ पदाधिकारी अस्वस्थ आहेत. विशेषत: भरत शहा, हे नाराज असल्याचे समजते. त्यामुळे निवडणुकीत पक्षाच्या कामगिरीवर परिणाम होण्याची शक्यता आहे.
या पार्श्वभूमीवर शरद पवार यांनी आज, रविवारी इंदापूरमध्ये जाऊन भरत शहा यांची भेट घेतली. या बैठकीत हर्षवर्धन पाटील देखील सहभागी होते. जवळपास अर्धा तास चाललेल्या या चर्चेत शरद पवार यांनी शहा यांची नाराजी दूर करण्याचा प्रयत्न केला आहे. हर्षवर्धन पाटील यांना मिळालेल्या उमेदवारीवरून पक्षातील मतभेद दूर करण्यासाठी पवार यांनी मध्यस्थी करण्याचा प्रयत्न केला असला तरी या बैठकीत नेमकी काय चर्चा झाली हे स्पष्ट झालेले नाही. तथापि शरद पवार यांच्या या भेटीनंतर पाटील यांच्या बाजूने पक्षाचे वातावरण अनुकूल होईल अशी अपेक्षा आहे.
इंदापूर मतदारसंघात हर्षवर्धन पाटील यांच्यासमोर अजित पवार गटाचे दत्तात्रय भरणे हे प्रमुख प्रतिस्पर्धी आहेत. भरणे यांना इंदापूरमधून उमेदवारी देण्यात आल्यामुळे या निवडणुकीत महाविकास आघाडीतील अंतर्गत स्पर्धा दिसून येत आहे. तसेच प्रवीण माने यांनीदेखील अपक्ष उमेदवारी अर्ज दाखल करून निवडणुकीत उतरण्याची तयारी दर्शवली आहे. त्यामुळे या मतदारसंघात अनेक उमेदवार आणि गट एकत्र येत असल्याने निवडणुकीचे गणित अधिक गुंतागुंतीचे बनले आहे.
