चंद्रपूर – चंद्रपूर मतदारसंघातून सुधीर मुनगंटीवार हे विक्रमी मतांनी विजयी होतील. एनडीए, शिवसेना आणि पंतप्रधान नरेंद्र मोदी द्विग्वीजयाची गुढी देखील उभारतील. तसेच, पंतप्रधान म्हणून हॅट्रीक देखील मारतील, असा विश्वास मुख्यमंत्री एकनाथ शिंदे यांनी व्यक्त केला. चंद्रपुरात आज पंतप्रधान नरेंद्र मोदी यांची सभा आहे. या सभेपूर्वी मुख्यमंत्री एकनाथ शिंदे यांनी विरोधकांवर निशाणा साधला.
“प्रभ श्रीरामाच्या पदस्पर्शाने पावन झालेली ही भूमी आहे. या भूमीवर प्रभू रामचंद्राचा आशिर्वाद मिळालेले, जगात एक नंबरची लोकप्रिय असलेले आणि पंतप्रधान नरेंद्र मोदी यांची पहिली सभा चंद्रपुरात होत आहे. महाराष्ट्रात पहिला प्रचाराचा नाराळ चंद्रपुरात फुटतो आहे. हा केवळ योगायोग नाही तर, ही विजयाची नांदी आहे”, असे एकनाथ शिंदे म्हणाले.
“खरंतर, पंतप्रधान नरेद्र मोदी यांच्या सभेला मोठ्या प्रमाणात जनसागर आला आहे. या जनसागरात आपल्याला उद्याचा जल्लोष दिसतो आहे. असाच जल्लोष आपल्याला 4 जून रोजी निवडणुकांचा निकाल लागल्यानंतर करायचा आहे. या मतदारसंघातून सुधीर मुनगंटीवार हे विक्रमी मतांनी विजयी व्हाल आणि एनडीए, शिवसेना आणि पंतप्रधान नरेंद्र मोदी द्विग्वीजयाची गुढी देखील उभारतील. तसेच, पंतप्रधान म्हणून हॅट्रीक देखील मारतील”, असा विश्वास एकनाथ शिंदे यांनी व्यक्त केला.
“देशातील 140 कोटी जनतेने नरेंद्र मोदी यांना पुन्हा पंतप्रधान करण्यासाठी गॅरेंटी घेतली. देशात आणि मार्केटमध्ये मोदी गॅरेंटी चालते. पण इतरांच्या गॅरेंटीवर कोणी भरोसा करत नाही. त्याच पंतप्रधान नरेंद्र मोदी यांना पुन्हा पंतप्रधान बनवण्याचा निर्धार केला आहे”, अशा शब्दांत एकनाथ शिंदे यांनी विरोधकांवर निशाणा साधला.
