मुंबई – छत्रपती शिवाजी महाराजांनी अफझल खानाला मारताना वापरलेली वाघनखे लवकरच भारतात येणार आहे. या संदर्भात असलेला आचारसंहितेचा अडथळा दूर झाला असून, जुलै महिन्यात वाघनखे भारतात आणण्यात येतील, अशी माहिती सांस्कृतिक कार्यमंत्री सुधीर मुनगंटीवार यांनी सोमवारी दिली. लंडन येथील ‘व्हिक्टोरिया अँड अल्बर्ट म्युझियम’मध्ये असलेली ही वाघनखे तीन वर्षांसाठी भारतात आणली जाणार आहेत.
छत्रपती शिवाजी महाराजांची वाघनखे महाराष्ट्रात आणण्यासाठी सांस्कृतिक मंत्री सुधीर मुनगंटीवार यांनी काही दिवसांपूर्वीच ब्रिटनसोबत सामंजस्य करार केला होता. चार जूनला वाघनखे भारतात येणे अपेक्षित होते. मात्र, आचारसंहितेमुळे त्यात अडथळे आले. आता लोकसभा निवडणुकीची आचारसंहिता संपुष्टात आली असून, ही वाघनखे भारतात आणण्याच्या हालचाली सुरू झाल्या आहेत. लवकरच या संदर्भातील अधिकृत घोषणा करण्यात येणार आहे.
