नाशिक : भारतीय रेल्वे विभागाच्या नाशिक येथील इंडियन रेल्वे इन्स्टिट्यूट ऑफ इलेक्ट्रिकल इंजीनियरिंग नशिक (IRIEEN) येथे महात्मा जोतीराव फुले यांच्या नावाने अभ्यास केंद्र सुरू करावे, अशी मागणी राज्याचे माजी उपमुख्यमंत्री छगन भुजबळ यांनी केंद्रीय रेल्वेमंत्री अश्विनी वैष्णव यांच्याकडे पत्राद्वारे केली आहे. माजी उपमुख्यमंत्री छगन भुजबळ यांनी दिलेल्या पत्रात म्हटले आहे की, महात्मा जोतीराव फुले व सावित्रीबाई फुले यांनी १८६३ साली विधवा निराधार स्त्रियांना व गरोदर स्त्रियांना सुरक्षित आश्रय देण्यासाठी आपल्या फुले वाड्यात महिला सुरक्षा केंद्र सुरू केले. हे महिला सुरक्षा केंद्र त्याकाळी असंख्य महिलांसाठी सुरक्षित व सन्मानाचे जीवन देणारे आशेचा केंद्र ठरले. महात्मा फुलेंचे हे कार्य पुढील अनेक पिढ्यांना समाजाप्रती असलेले उत्तरदायित्व सांगणारे प्रेरणास्थान ठरले.
रेल्वे विभागाच्या नाशिक येथील IRIEEN संस्थेत विभागातील तंत्रज्ञांना KAVACH 4.0 या तंत्रज्ञानाचे प्रशिक्षण दिले जाते. हे तंत्रज्ञान भारताचे स्वयंचलित रेल्वे सुरक्षा तंत्रज्ञान (Automatic Railway Protection) आहे. या तंत्रज्ञानाच्या माध्यमातून भारतीय रेल्वे अधिक गतिमान व सुरक्षित होत आहे. आतापर्यंत रेल्वे विभागाच्या 9000 पेक्षा जास्त तंत्रज्ञांनी IRIEEN येथे KAVACH तंत्रज्ञानाचे प्रशिक्षण घेतले आहे. या तंत्रज्ञानाच्या माध्यमातून भारतीय रेल्वेला सुरक्षा प्रदान करणाऱ्या संस्थेत देशातील असंख्य महिलांना सुरक्षेचे व सन्मानाचे जीवन देणाऱ्या महात्मा जोतीराव फुले यांच्या नावे अभ्यास केंद्र सुरू करणे हा त्यांच्या कार्याचा उचित सन्मान ठरेल, अशी मागणी छगन भुजबळ यांनी रेल्वेमंत्री अश्विनी वैष्णव यांच्याकडे केली आहे.
